IBafana Bafana ivule kakuhle kwitumente ye-Africa Cup of Nations njengokuba ibethe i-Angola ngamanqaku amabini kwelinye kumdlalo kaGroup B eMarrakech Stadium kwelaseMorocco ngokuhlwa kwangoMvulo.
IBafana iphale phambili ngomzuzu wamashumi amabini ananye ngenqaku elifakwe ngu-Oswin Appollis emva komdlalo omhle kaLyle Foster.
Emva kokuzama izihlandlo ngezihlandlo, iiBlack Antelopes zifake inqaku lokulinganisa lisiza noManuel Luis da Silva Cafumana, onikwe ibhola ngu-Alfredo Kulembo Ribeiro kwimizuzu elishumi ngaphambi kokuhlaba ikhefu.
UTshepang Moremi ebecinga ukuba ulifakile inqaku lesibini leBafana, kanti iVAR izakuthetha enye into. Liye alavunywa inqaku lakhe njengokuba usompempe ethe u-Appollis udlale ibhola emva kokolalela.
Ngelingeni iBafana ilifakile inqaku lesibini ngequza likaFoster ngebhola entle ayibethe ngaphaya konozinti wase-Angola uHugo Marques emva kwebhola ebisuka kuMoremi.
Kusenjalo, iChipolopolo yaseZambia ibambene ngenqaku macala omabini nee-Eagles zaseMali.
