Emva kokuphumelela intshinga ye-International Boxing Organisation (IBO) Africa kwicandelo labasetyhini kudidi lwejunior-featherweight kulonyaka ophelileyo, uSimamkele Tutsheni uzakuqhubela phambili nesakhono sakhe samanqindi.
Etyikitye isivumelwano seminyaka emibini ethelekiswa yiGolden Gloves, uTutsheni, osisicimamlilo eKapa, uzakucela umngeni kwintshatsheli ye-IBO kwicandelo labasetyhini kudidi lwejunior-featherweight nengummi wasePoland uLaura Monika Grzyb kwelasePoland ngoMgqibelo umhla weshumi elinesine kuMatshi.
UTutsheni, ozinze KwaLanga, waphumelela intshinga ye-IBO emva kokubetha uCaleigh Swart ngamanqaku e-Emperors Palace, eKempton Park, Ekurhuleni, ngo-Agasti kulonyaka ophelileyo.
Eqinisekisa ngalomlo, umqeqeshi kaTutsheni, uFelix Venganayi, uthe: “USima uzakulwa noLaura Grzyb wasePoland.”
Lomlo uzakube uthelekisa iimbethi-manqindi ezimbini nezingekabethwa. UTutsheni uyiphumelele yosibhozo imilo yakhe, enqumamise oosisi abathathu.
Kwelinye icala, uGrzyb, oneminyaka engamashumi amathathu nohlala eJastrzebie Zdroj kwelasePoland, uyiphumelele yolishumi elinanye imilo yakhe, enqumamise oosisi abathathu.
Ukanti, uGrzyb uzakube ekhusela intshinga yakhe okokuqala ukususela mhla wabetha ummi waseSpain uSarai Umpierrez eNosalowy Dwór Resort and Spa, eZakopane, kwelasePoland ngo-Okthobha 2024 – Monwabisi Jimlongo
