Ibuyele kwindawo yokuqala i-Orlando Pirates emva kokuquthisa AmaZulu ngamanqaku amabini eqandeni kumdlalo weBetway Premiership eMoses Mabhida Stadium, eThekwini, ngokuhlwa kwangoLwesibini.
IiBuccaneers bezihamba phambili ngenqaku elinye eqandeni ekupheleni kwesiqingatha sokuqala ngenqaku elifakwe nguRelebohile Mofokeng kwibhola ebisuka kuTshepang Moremi ngomzuzu wesithandathu. Inqaku lesibini lePirates lize ngethuba unozinti woSuthu uDarren Johnson ehlaba ngomkhonto ekhaya xa kuzakuphela umdlalo.
Ngenxa yalempumelelo, iPirates ibuyele encochoyini yamanqwanqwa ePremiership ngamanqaku angamashumi amathathu anesihlanu kwimidlalo elishumi elinesihlanu. Kungoku nje, ezizangxa zaseSoweto azikabethwa kwimidlalo elishumi elinambini.
