IMamelodi Sundowns ibethe i-Orlando Pirates ngamanqaku amabini kwelinye kumdlalo weBetway Premiership eFNB Stadium, eNasrec, eRhawutini, ngokuhlwa kwangoLwesithathu.
IiBrazilians ziphale phambili ngenqaku elifakwe ngummi waseColombia uBrayan León ngomzuzu wamashumi amathathu anesithandathu kwibhola ebisuka kuNuno Santos. Kwimizuzu nje emine elandelayo, uLeón ufake inqaku lesibini kwibhola ebivela kuMaphosa Modiba nto ke leyo ekhokelele ekubeni izangxa zaseTshwane ziphale phambili ngamanqaku amabini eqandeni ekupheleni kwesiqingatha sokuqala.
IPirates ifake inqaku kwimizuzu emithathu siqalile isiqingatha sesibini ngequza likaPatrick Maswanganyi nangona ibhola iye yabetheka kumdlali weSundowns ngaphambi kokungcangcazelisa umnatha.
