Alikho iqela elivume ukugoba uphondo njengokuba AmaZulu ebambene ngamanqaku amabini macala omabini neSekhukhune United kumdlalo weBetway Premiership ePrincess Magogo Stadium, KwaMashu, eThekwini, ngokuhlwa kwangoMvulo.
Usuthu luphale phambili ngenqaku likaThapelo Matlhoko kwibhola ebivela ku-Athini Maqokolo ngomzuzu wamashumi amabini anesine. Emva kokuzama izihlandlo eziliqela, ngelingeni iBabina Noko ilifakile inqaku lokulinganisa lisiza no-Olerato Mandi kwibhola ebisuka kuKeletso Makgalwa.
Kwimizuzu nje emithandathu siqalile isiqingatha sesibini, umdlali wasemva uNkosikhona Radebe unike Usuthu inqaku lesibini. Kodwa nayo iBabina Noko iphinde yafaka inqaku ngequza likaBright Ndlovu ngomzuzu wamashumi asixhenxe anesixhenxe.
