U-Amzolele ‘Globe’ Dyeyi, obengomnye weembethi-manqindi eziphambili kudidi lwabangahlawulwayo, uzakulwa okokuqala kudidi lwabahlawulwayo emva kokukhulula ivesti yakhe.
UDyeyi, owaphumelela imbasa yesilivere kutsha nje kwitumente yeMandela African Boxing Cup e-Inkosi Albert Luthuli International Convention (ICC) eThekwini, uzakulwa noLoyiso Basayi, ongekaphumeleli, kwisithuba esingaphantsi kweeveki ezimbini.
Lenzalelwane yaseMdantsane ivana amandla noBasayi, obethwe kuyo yomibini imilo yakhe, kudidi lwentambanani kwitumente yeFantastic 2 Boxing Promotions eKibler Park Recreation Centre kumazantsi eRhawuti ngoLwesihlanu umhla wamashumi amabini anesine kuMeyi.
UDyeyi, oneminyaka engamashumi amabini anesibini wayesakuqeqeshwa nguZolile ‘Gqo’ Mahambi eMdantsane, wayeyinjinga yaseMpuma Koloni izihlandlo ezintathu, kwaye wakhe wabayintshatsheli yoMzantsi Afrika kabini.
Kungoku nje, uDyeyi uqeqeshwa eGauteng nguKhangelani Jack, owaphumelela imbasa ye-2023 Trainer of the Year.
