Ayisekho itumente yamanqindi ebizakwenziwa yiDavid Faas Productions e-OR Tambo Hall, eKhayelitsha, eKapa ngoMgqibelo umhla wamashumi amabini anesixhenxe kuJulayi.
I-Ink Sport ingadiza ukuba letumente ebinomlo ophambili weWorld Boxing Federation (WBF) Intercontinental kudidi lwejunior-bantamweight phakathi kukaGideon ‘Hardcore’ Buthelezi noTinashe Mahashe imiselwe omnye umhla.
UJackie Brice weJackie Brice Boxing Promotions uzakubamba ilima noDavid Faas weDavid Faas Productions besenza letumente ngomhla wamashumi amathathu ananye ku-Agasti.
“Ndikuzayenza letumente yamazwe ngamazwe kuba uDavid unempepha zokwenza itumente yophuhliso kuphela. Letumente izakuba ngmhla wamashumi amathathu ananye ku-Agasti. Oku ndikwenza kuba uDavid sele ndimaze iminyaka emininzi,” utshilo uBrice.
UFaas uphefumle wenjenje xa ebethetha ngaletumente: “Ewe, itumente imiselwe inyanga ezayo. Izakwenziwa ndim noJackie.”
UButhelezi usezokulwa noMahashe, logama iimbethi-manqindi zikaBrice uSimamkele Tutsheni noNtombokuqala Tolashe bezakulwa neembethi-manqindi ezingekachazwa. – Monwabisi Jimlongo
