Ngelingeni uSiyakholwa Kuse uzakukhusela intshinga yakhe yoMzantsi Afrika kudidi lweminimumweight emva konyaka wayiphumelela ebetha uBangile Nyangani kumlo owawuyimpinda e-International Convention Centre (ICC) eMonti.
UKuse, okwayinjinga ye-African Boxing Union (ABU) kudidi lweminimumweight, uzakukhusela intshinga yakhe yoMzantsi Afrika kuMalaki Sobolo, oqeqeshwa nguMapetla Mzamo, ngeCawa umhla wesine ku-Agasti.
Lenzalelwane yaseMdantsane ayikalwi kususela mhla yanqumamisa uKhalid Kalama Ally waseTanzania kumjikelo wesibhozo kumlo wentshinga ye-ABU eWhittlesea Multipurpose Hall, eSada, ngoDisemba kulonyaka ophelileyo.
Kwelinye icala, uSobolo waseDuncan Village, eMonti, nobekwa kwindawo yesithathu, uya kulomlo emva kokubetha uPhumlani Maloni waseMakhanda ngo-Okthobha kulonyaka ophelileyo.
Kusenjalo, uKuse kwakufanele ukuba ukhusela intshinga yakhe kuSiphesihle Sityo, kodwa lomfana uye wathi gu bucala emva kwelishwa lokonzakala ngethuba ehlaselwa ziindladiya.
