Ukuzenzela igama nokuqinisekisa ukuba ubuyela kuluhlu lweembethi-manqindi eziphambili ehlabathini zizinto ezikhuthaza u-Azinga ‘Golden Boy’ Fuzile njengokuba esilwa noSultan Zaurbek waseKazakhstan ngoMgqibelo.
UFuzile, oneminyaka engamashumi amabini anesibhozo, uzakulwa noZaurbek kumlo wentshinga ye-International Boxing Federation (IBF) Intercontinental kudidi lwejunior-lightweight eBarys Arena, e-Astana.
Lenzalelwane yaseDuncan Village, enikele umva uMzantsi Afrika ihamba nabaqeqeshi uZolani Tete noLonwabo Witbooi kuleCawa egqithileyo, izakulwa noZaurbek ongekabethwa. UZaurbek uyiphumelele yolishumi elinethoba imilo yakhe, enqumamise amadoda alishumi elinesithathu.
“U-Azinga uchithe phantse iiveki ezisibhozo kwinkampu yokuzilolonga, elungiselela umlo noZaurbek. Sazimisela ngalomlo kwa ngosuku esaqala ukuva ngawo. Siyayazi ukuba eli lithuba lokokuba u-Azinga aphinde alwe kwinqanaba lamazwe ngamazwe ukuze azalisekise iphupha lakhe lokuba yintshatsheli yehlabathi ngenye imini,” utshilo uTete, oqeqeshe uFuzile emlungiselela lo mlo.
UTete, oyinjinga yamhlamnene kwi-International Boxing Federation (IBF) kudidi lwejunior-bantamweight neWorld Boxing Organisation (WBO) kudidi lwentambanani, wongeze ngelithi: “Sisebenze nzima kakhulu, sisazi kakuhle ukuba uZaurbek akayiyo imbethi-manqindi elula. Siye sawuceba lo mlo kuba u-Azinga uyayidinga impumelelo. Nathi siyayidinga impumelelo. Into endifuna ukuyithetha kukuba u-Azinga uwulungele umlo. Ukuba ke into ithi makalwe ade ophuke ingalo, makube njalo ke. Uncame izinto ezininzi ngethuba elungiselela lo mlo.”
Kusenjalo, uZaurbek, oneminyaka engamashumi amabini anesibhozo, uzakulwa okokuqala kwilizwe lakhe lokuzalwa njengokuba wagqibela ukulwa phaya ngoDisemba 2021. – Monwabisi Jimlongo
