USiyakholwa Kuse uyayazi ukuba akusekho ukubuya ngamva ngoku njengokuba ebala iiyure ngaphambi kokucela umngeni kwintshatsheli yeWorld Boxing Council (WBC) kudidi lwestrawweight uMelvin Jerusalem ngoLwesithathu.
Bobabini uKuse noJerusalem babenze lula ubunzima obebulindelekile ngaphambi kwalomlo ozakubanjelwa eSmart Araneta Coliseum, eQuezon City, eManila, kwelasePhilippines.
“Ndiziva ndiwulungele umlo, ndomelele. Ndizakuba yintshatsheli yeWBC ngoLwesithathu,” utshilo uKuse.
UKuse, oyinzalelwane yaseMdantsane nowayeyinjinga yoMzantsi Afrika ne-African Boxing Union (ABU) kudidi lweminimumweight, uzakube esilwela ukuba abeyimbethi-manqindi yokuqala yaseMpuma Koloni ukuphumelela intshinga yehlabathi ngaphantsi kweWBC.
Uzakuphinda azame nokuba yimbethi-manqindi yokuqala kwilizwekazi i-Afrika ukukhonya kudidi lwestrawweight ngaphantsi kweWBC. Ziimbethi-manqindi zase-Asia, kumbindi noMzantsi Melika ekukudala zikhonya kudidi lwestrawweight kwiWBC. – Monwabisi Jimlongo
