Iqela loMzantsi Afrika labaneminyaka engaphantsi kweshumi elinesixhenxe, Amajimbos, abambene ngenqaku elinye macala noosotheko iQatar kumdlalo weNdebe yeHlabathi eDoha ngokuhlwa kwangoLwesine.
Amakhwenkwe aseQatar akhawuleze abhalisa ebhodini ngethuba uMohamed Yazan efaka inqaku kumzuzu wesithathu umdlalo uqalile kwibhola ebivela kuZaid Ktit.
Kuthabathe Amajimbos imizuzu elishumi elinesithathu ngaphambi kokufaka inqaku lokulinganisa ngequza lika-Emile Witbooi kwibhola ebisuka kuKamohelo Mareletse.
Amajimbos akwindawo yesibini kuGroup A emva kokuphumelela umdlalo omnye aphinda adlala ngokulingana komnye. Ukanti i-Italy ime phezulu njengokuba iyiphumelele yomibini imidlalo yayo.
