IBanyana Banyana ibonakalise ubungangamsha bayo ngethuba iquthisa ii-Atlas Lionesses zaseMorocco ngamanqaku amabini eqandeni kumdlalo wobuhlobo e-Adrar Stadium, e-Agadir, kwelaseMorocco ngokuhlwa kwangoLwesibini.
Emva kokuba isiqingatha sokuqala siphele kungekho manqaku, iBanyana ingcangcazelise umnatha iizihlandlo ezimbini kwimizuzu engamashumi amabini yokugqibela, yaze yawuphumelela umdlalo.
Inqaku lokuqala leBanyana lifakwe nguNonhlanhla Mthandi ngomzuzu wamashumi asixhenxe, waze uNoxolo Cesane wabethelela isikhonkwane sokugqibela kumkhumbi wee-Atlas Lionesses kwimizuzu emine ngaphambi kokuphela komdlalo.
