Njengokuba uNkosingiphile Sibisi elungiselela ukukhusela intshinga yakhe yoMzantsi Afrika kudidi lwempukane, unyeke ukuphinda into awayeyenze kuNjabulo Buthelezi ngoJulayi 2023.
USibisi uzakukhusela intshinga yakhe xa equbisana noButhelezi eHowick Indoor Sports Centre, KwaZulu-Natal, ngoLwesihlanu umhla weshumi elinesibhozo kuDisemba.
Abalawuli bakaButhelezi abazange baxole sisigwebo sabagwebi ngethuba ebethwa nguSibisi njengokuba babekholelwa ukuba wayenze ngokwaneleyo ukuba awuphumelele umlo. USibisi wabetha uButhelezi ngamanqaku kwiholo yesixeko saseMgungundlovu.
“Akunjalo, qha babesithela ngesebe lenkawu. Andinaxhala lakhe. Ndizakumbonisa into endibhinqe ngayo, ndimbonise ukuba andisenguye lamntu wayelwe naye kwintshinga yaKwaZulu-Natal. Ndizakumbetha kakhulu kwesi isihlandlo,” utshilo uSibisi.
USibisi waseDannhauser, KwaZulu-Natal, uyiphumelele yolishumi elinambini imilo yakhe, enqumamise amadoda amabini. Sele ekhusele intshinga yakhe kuSamkelo Frank Sotomela, uZolile Miya noTheo Nxayiphi. – Monwabisi Jimlongo
