Sekumbovu ukuba iMamelodi Sundowns iyikhusele ngempumelelo intshinga yayo yeDStv Premiership emva kokutywatyusha iTS Galaxy ngamanqaku amathathu eqandeni eLoftus Versfeld, ePitoli, ngokuhlwa kwangoMvulo.
Ifolosi yaseNamibia uPeter Shalulile, obekusele kunzima kuye ngenxa yembalela yamanqaku, ubeke iinkunzi zaseTshwane phambili efaka inqaku lokuqala ngomzuzu wamashumi amabini anesithandathu.
Kwimizuzu elithoba emva koko, uShalulile ufake inqaku lakhe lesibini zaze iiBrazilians, ezingekabethwa kwimidlalo engamashumi amane anesixhenxe kwiDStv Premiership, zaphala phambili ngamabini eqandeni ekupheleni kwesiqingatha sokuqala.
UThembinkosi Lorch uqinisekise ukuba yonke into igqityiwe ngethuba efaka inqaku lesithathu leeBrazilians ngomzuzu wamashumi amathandathu anesihlanu.
