Ingqonyela yeGolden Gloves, uRodney Berman, umothulele umnqwazi uMelvin Jerusalem wasePhilippines emva kokuvuma ukuzokukhusela intshinga yakhe yeWorld Boxing Council (WBC) kudidi lweminimumweight eMzantsi Afrika njengokuba ezakulwa noSiyakholwa Kuse ngoMgqibelo.
UJerusalem uzakuvana amandla noKuse kumlo oyimpinda e-Emperors Palace, eKempton Park, Ekurhuleni, emva kweenyanga ezisixhenxe ezimbethi-manqindi zimbini zalwa okokuqala eManila kwePhilippines. UJerusalem wawuphumelela ngamanqaku loomlo lowo.
Ethetha ngesigqibo sikaJerusalem sokuzokulwa eMzantsi Afrika, uBerman uthe: “Luphawu lwentshatsheli yokwenene. Uchwayitile ukuzokukhusela kuKuse eMzantsi Afrika. Uluntu loMzantsi Afrika luzakubukela omnye wemilo emikhulu ngokuhlwa kwangoMgqibelo. Izakuba ngamanqindi akwiqondo eliphezulu.”
Ngendlela azimisele ngayo, uJerusalem, oneminyaka engamashumi amathathu anesibini, ugaleleke eMzantsi Afrika kwangethuba ukuze aziqhelanise nemozulu yaseHighveld. – Monwabisi Jimlongo
