Kuphunywe iphulo kukhangelwa imbethi-manqindi ezakulwa noXolisani ‘Nomeva’ Ndongeni emva kokuba erhoxile uSanele ‘Tornado’ Msimang kumlo nalenjinga yamhlamnene eMzantsi Afrika nakwihlabathi kuleveki ezayo.
UMsimang ufumene ilishwa lokutsha esiswini nasesandleni, waze warhoxa kulomlo obuzakubanjelwa eJan Smuts Stadium KuGompo City ngoMgqibelo kuleveki ezayo. Umlo kaMsimang noNdongeni ubuququzelelwa yiGround Up Boxing Promotions.
“UMsimang urhoxile kumlo noNdongeni ngenxa yokonzakala. UMsimang utshe ngamanzi abilileyo esiswini nasesandleni. Sidane kakhulu yilento eyenzekileyo,” utshilo uSandile Vilakazi weSyathaba Boxing Promotions nongumthelekisi kaMsimang.
Njengokuba uMsimang erhoxile kulomlo, abaququzeleli behla benyuka bekhangela imbethi-manqindi ezakulwa noNdongeni kumlo wakhe wokugqibela kudidi lwabahlawulwayo. – Monwabisi Jimlongo
