Ebekwa kwindawo yesibhozo kuluhlu lukaBoxing South Africa (BSA), u-Amzolele ‘Globe’ Dyeyi uzakubuyela eqongeni njengokuba ezakulwela intshinga engamntu yephondo leMpuma Koloni xa equbisana noLubabalo Soga.
Kulindeleke ukuba uDyeyi noSoga bavane amandla eGuild Theatre KuGompo City ngeCawa umhla wethoba ku-Agasti. Ikhona nento ethi lomlo ungasiwa kwinyanga kaSeptemba.
“Sityikitye isivumelwano somlo sokulwa noLubabalo Soga kwintshinga yaseMpuma Koloni. UGlobe usenkampini, elungiselela lomlo, kwaye sele ewulungele,” udize watsho uShannon Strydom, ongumqeqeshi kaDyeyi.
Lomlo wentshinga yephondo uzakudibanisa iimbethi-manqindi ezimbini nezingekabethwa njengokuba uDyeyi eyiphumelele yomihlanu imilo yakhe, enqumamise amadoda amathathu. Ukanti, uSoga unqumamise amadoda amabini ngethuba ephumelela imilo yakhe emithathu.
Kumlo wakhe wokugqibela, uDyeyi waphumelela ngokunqumamisa uMawethu Limo kumjikelo wesithathu kuKomani kwiinyanga ezine ezigqithileyo, logama uSoga enqumamise uSiphosethu Madasi kumjikelo wokuqala eNelson Mandela Bay Stadium, eGqeberha, ebutsheni balenyanga. – Monwabisi Jimlongo
