IMamelodi Sundowns itywatyushe iRichards Bay FC ngamanqaku amane kwelinye kumdlalo weBetway Premiership ePrincess Magogo Stadium, KwaMashu, eThekwniji, ngokuhlwa kwangoLwesibini.
Kuthabathe izangxa zaseTshwane ngaphantsi kwemizuzu engamashumi amabini ukuba zifake inqaku lazo lokuqala ngequza likaTashreeq Matthews ngomzuzu weshumi elinethoba. Kuthabathe nje imizuzu emithathu ngaphambi kokuba uLwandile Mabuya afake inqaku lokulinganisa.
Kwimizuzu esibhozo ngaphambi koluhlaba ikhefu, ifolosi yeBafana Bafana, u-Iqraam Rayners, ufake inqaku lesibini leentshatsheli zase-Afrika. URayners wongeze amanqaku akhe kwimizuzu emithathu siqalile isiqingatha sesibini.
Kuthe kanti iSundowns ayikagqibi njengokuba uFawaaz Basadien efake inqaku elihle kanye xa kuphela iyure umdlalo uqalile.
Kusenjalo, i-Orlando Pirates iquthise i-TS Galaxy ngamanqaku amathathu eqandeni kumdlalo obubanjelwe e-Orlando Amstel Arena, Soweto.
Amanqaku eeBuccaneers afakwe nguBoitumelo Radiopane, uTshepang Moremi noSimphiwe Masilela.
Ukanti, iKaizer Chiefs ibambene ngenqaku macala omabini neStellenbosch FC e-FNB Stadium, eNasrec, eRhawutini. USinoxolo Kwayiba ufake inqaku leqela laseCape Winelands, logama uMduduzi Shabalala efake eleChiefs.
UMlondi Mbanjwa no-Athini Maqokolo bafake inqaku umntu ngamnye ngethuba AmaZulu ebetha iDurban City ngamanqaku amabini kwelinye eChatsworth Stadium, eThekwini. Inqaku leCity lifakwe nguHaashim Domingo.
