Intshatsheli yoMzantsi Afrika kudidi losiba, uZolisa Batyi, uzakubuyela eMonti ngoLwesithathu emva kokuchitha iveki yonke kwinkampu yokuziqeqesha eThekwini, njengokuba elungiselela ukukhusela intshinga yakhe isihlandlo sesibini xa esilwa noYamkela Phaliso kwisithuba sento engaphaya kweeveki ezintathu.
UBatyi, owahlutha lentshinga ngokubetha owayeyintshatsheli uJeff Magagane eNgoako Ramatlhodi Sports Complex eSeshego, ePolokwane, ngoDisemba ka-2022, uzakulwa noPhaliso e-Orient Theatre, eMonti, ngeCawa umhla wamashumi amathathu ananye kuMatshi. UBatyi ubeseThekwini kunye nomqeqeshi wakhe uKhangelani Jack.
“UBatyi noJack bemke baya kwinkampu yokuziqeqesha eThekwini kuleveki ephelileyo. Bazakubuyela eMonti ngoLwesithathu,” utshilo uBaba Makala, ongumphathi kaJack.
UBatyi uzakuya kumlo wakhe noPhaliso emva kukudlala ntanga nye nomhlali waseKapa, u-Abdul-Aziz Kunert, eCape Peninsula University of Technology (CPUT) eBellville ngo-Agasti wonyaka ophelileyo. Kusenjalo, uPhaliso wanqumamisa u-Itumeleng Tsholo kumjikelo wesibini kumlo wabo owawuseWhittlesea Multipurpose Hall, eSada, ngoDisemba.
