Ifolosi uLyle Foster urhoxile kwiqela leBafana Bafana elizakudlala neCongo eBrazzaville ngomso kumdlalo wokuzibekela indawo kwitumente yamazwe ngamazwe ase-Afrika yonyaka ozayo.
UFoster, oselebuyele kwiqela lakhe iBurnley eNgilane, wonzakele kwidolo lasekhohlo ngethuba iBafana itywatyusha iCongo ngamanqaku amahlanu eqandeni eNelson Mandela Bay Stadium eGqeberha ngoLwesihlanu.
Eligatyana elineminyaka engamashumi amabini anesine belingomnye wabadlali abafake amanqaku kumdlalo weveki ephelileyo. Oogqirha beBafana bathe ayikho imfuneko yokokuba uFoster enze uqhaqho.
