Nangona nje umlo wakhe olandelayo iseyindaba yakwamkhozi, singadiza ukuba intshatsheli yamhlamnene eMzantsi Afrika kudidi losiba u-Azinga ‘Golden Boy’ Fuzile ubila esoma eRhawutini.
UFuzile, oyinzalelwane yaseDuncan Village, unikele iMonti umva ngoMgqibelo l eyozimanya nomqeqeshi wakhe uZolani ‘Last Born’ Tete eRhawutini.
UTete sekulithuba eqeqesha uBekizizwe Maitse ngaphambi komlo wakhe nommi waseMelika u-Iman kumjikelo wesithathu weWBC Grand Prix eRiyadh kwelaseSaudi Arabia kuleveki ezayo.
Xa ebebuzwa malunga nomlo olandelayo wembethi-manqindi yakhe, uMlandeli Tengimfene, ongumphathi kaFuzile, akakhange athethe nto eninzi, ngaphandle kokuthi: “Ewe, u-Azinga uziqeqesha noZolani eRhawutini.”
I-Ink Sport ihletyelwe ngooNokrawuzana ukuba lembethi-manqindi eyakhe yalwela intshinga ye-International Boxing Federation (IBF) kudidi lwejunior-lightweight izakulwa eMexico kwiinyanga ezimbini ezizayo nangona lingekathiwa pahaha igama lembethi-manqindi azakulwa nayo.
UFuzile, ophumelele imilo elishumi elinesibhozo, enqumamise amadoda alishumi elinambini, wabethwa kwimilo emithathu, wabethwa ngummi waseKazakhstan uSultan Zaurbek kumlo wentshinga eyayingenamntu kwi-IBF Intercontinental kudidi lwejunior-lightweight kwelaseKazakhstan kwiinyanga ezine ezigqithileyo.
UFuzile, oneminyaka engamashumi amabini anethoba, wabethwa okokuqala kwimilo yakhe emine yokugqibela. – Monwabisi Jimlongo
