Owayesakubayimbethi-manqindi ephambili neyayibekwa kuluhlu lweembethi-manqindi ezilishumi elinesihlanu eziphambili ehlabathini, uNhlanhla ‘Mount Kilimanjaro’ Tyirha, uzakulwela intshinga ye-International Boxing Organisation (IBO) kudidi lweminimumweight ekuthambekeni kwenyanga ezayo.
UTyirha, owayeyinjinga yoMzantsi Afrika kudidi lwejunior-flyweight, uzakulwa nommi wasePhilippines uJoey Canoy e-Emperors Palace, eKempton Park, Ekurhuleni, ngoMgqibelo umhla wamashumi amabini anethoba kuNovemba.
UTyirha ukwindawo yeshumi elinambini kuluhlu lwe-IBO, logama uCanoy ekwindawo yethoba. Izakuba sisihlandlo sesithathu esi uCanoy elinga ukuphumelela lentshinga emva kokufeda izihlandlo ezimbini.
Lomlo uzakuyibanxalenye yetumente yeGolden Gloves, apho uRicardo Malajika azakukhusela intshinga yakhe ye-IBO kudidi lwejunior-bantamweight isihlandlo sesine kumlo noVince Paras wasePhilippines.
Umlo kaMalajika noParas uzakuphinda ubengowokuzibekela indawo kwilungelo lokucela umngeni kumlo wentshinga ye-International Boxing Federation (IBF).
Kusenjalo, uTyirha wayebekwa kwindawo ephezulu ngaphambi kokothuswa nguGeorge Kandulo waseMalawi e-ICC ngoJulayi 2023.
UTyirha wayebekwa kwindawo yesithandathu kwiWBC, eyeshumi elinambini kwiWBA, eyesihlanu kwi-IBF neyesixhenxe kwiWBO ngaphambi kokunqunyanyiswa kumjikelo wesithandathu nguKandulo.
