U-Akani ‘Prime’ Phuzi akanaxhala lanto nangona nje ungasekho umlo wakhe nembethi-manqindi ephambili kwelaseCanada uRyan ‘The Bruiser’ Rozicki, mlo lowo ubuzakubanjwa ngoMgqibelo umhla wamashumi amabini anesihlanu ku-Okthobha (ngeCawa umhla wamashumi amabini anesithandathu, ngokwexesha loMzantsi Afrika).
Lomlo weWorld Boxing Council (WBC) Continental Americas kudidi lwecruiserweight uchithwe emva kokonzakala engalweni kukaRozicki ngethuba ekwinkampu yokuziqeqesha. URozicki ebelungiselela lomlo obuzakubanjelwa eCentre 2000 eSydney, eNova Scotia, kwelaseCanada.
“Kulungile, ziyenzeka izinto ezinje, ngamanqindi la. Ndizakuqhubela phambili ndisebenza,” uphefumle watsho uPhuzi, oyinzalelwane yaseMalamulele.
Lo, ibizakuba ngumlo wesibini kaPhuzi kulonyaka njengokuba wabetha uYoussouf Kasongo Mwanza waseDemocratic Republic of Congo (DRC) ePitoli kwiinyanga ezintlanu ezigqithileyo.
UPhuzi, oqeqeshwa nguDamien Durandt eRhawutini, uphumelele imilo elishumi elinesine, enqumamise amadoda amathandathu, wabethwa kwimilo emithathu. – Monwabisi Jimlongo
