UThulani Mbenge uzakukhusela intshinga yakhe ye-International Boxing Organisation (IBO) kudidi lwelterweight xa esilwa nommi waseRussia uVadim Musaev kulenyanga ezayo.
Emva kokunqumamisa u-Emmanuel Mungandjela waseNamibia kumjikelo wesithathu eSunBet Arena, ePitoli, kwiinyanga ezintandathu ezigqithileyo, uMbenge ufumana elinye ithuba lokulwa njengokuba ezakuqubisana noMusaev.
Eqeqeshwa nguSean Smith eRhawutini, umlo kaMbenge wokukhusela intshinga yakhe uzakubanjelwa eDuty Free Tennis Stadium, eDubai, kwelase-United Arab Emirates (UAE) ngoLwesihlanu umhla weshumi elinambini kuDisemba.
UMbenge, owayeyinjinga yoMzantsi Afrika kudidi lwewelterweight, waphumelela intshinga ye-IBO ngethuba wayebetha ummi waseBrithane uMichael McKinson eCopper Box Arena, eQueen Elizabeth Olympic Park, eHackney Wick, eLondon, e-United Kingdom, ngo-Okthobha nyakenye.
Kusenjalo, uMusaev, ozinze eHollywood, eFlorida, kwelaseMelika, uya kumlo noMbenge emva kokubetha ummi waseMexico uJose Miguel Borrego eTajikistan kwiinyanga ezine ezigqithileyo.
Elinxele laseRussia, elineminyaka engamashumi amathathu anesibini, liyiphumelele yolishumi elinesithathu imilo yalo, linqumamise amadoda asibhozo.
