Emva kokubuya kwikhefu le-Africa Cup of Nations, iMamelodi Sundowns iquthise i-Orbit College ngamanqaku amabini eqandeni kumdlalo weBetway Premiership eLoftus Versfeld, ePitoli, ngokuhlwa kwangoMvulo.
Iintshatsheli ezikhusela iBetway Premiership beziphala phambili ngenqaku elinye eqandeni ekupheleni kwesiqingatha sokuqala. Elonqaku lize no-Arthur Sales ngomzuzu wamashumi amabini ananye.
Umdlali omtsha weSundowns, uBrayan Léon, osandula ukuzimanya nezangxa zaseTshwane, ufake inqaku lesibini kwibhola ebisuka kuThato Sibiya ngomzuzu wamashumi amathandathu anesine, zaze ngaloondlela iiBrazilians zabuyela encochoyini yamanqwanqwa ePremiership.
