Ayisekho into ezakuyikhusela iKaizer Chiefs emva kokuba iStellenbosch FC iyilahlele ngaphandle kwiNedbank Cup ngokuyibetha ngamanqaku amabini kwelinye eCape Town Stadium ngokuhlwa kwangoLwesithathu.
Eliqela elizinze kwiCape Winelands liphale phambili ngamanqaku amabini eqandeni ekupheleni kwesiqingatha sokuqala njengokuba u-Ibraheem Jabaar efake inqaku lokuvula ngomzuzu weshumi, laze elesibini lafakwa nguDevin Titus kwimizuzu elishumi elinesithathu elandelayo. Amathemba Amakhosi aye avuseleleka ngethuba uFlavio da Silva efaka inqaku ngomzuzu wamashumi amahlanu anesithandathu.
Kusenjalo, neMamelodi Sundowns ingenile kumjikelo olandelayo weNedbank Cup emva kokubetha iGomora United ngamanqaku amabini kwelinye eLoftus Versfeld, ePitoli.
Lamaqela mabini ahlabe ikhefu ebambene ngenqaku elinye macala njengokuba umdlali weqela lesizwe laseNamibia uPeter Shalulile efake eleSundowns ngomzuzu wamashumi amane, logama uMpho Welcome Maoke ewalinganisile ngexesha elongezwe ngusompempe. UThapelo Morena ufake inqaku lesibini lezangxa zaseTshwane ngomzuzu wamashumi amathandathu ananye.
