AmaZulu adlulele kumjikelo olandelayo weNedbank Cup emva kokubetha iPolokwane City ngamanqaku amabini kwelinye e-Old Peter Mokaba Stadium, ePolokwane, ngokuhlwa kwangoLwesibini.
Lamaqela mabini ebebambene ngenqaku macala ekupheleni kwesiqingatha sokuqala njengokuba uTaariq Fielies ebefake inqaku loSuthu ngomzuzu weshumi, waze uLebohang Nkaki walinganisa xa kanye bekuzakuyiwa ekhefini.
Lomdlalo unyanzeleke uye kwixesha elongezelelweyo njengokuba belingekho iqela ebelivuma ukugoba uphondo. Inzalelwane yaseZimbabwe uThandolwenkosi Ngwenya ufake inqaku lempumelelo ngomzuzu wekhulu elineshumi elinesine.
