Omnye wabantu abaphambili emanqindini kwihlabathi jikelele, uMauricio Sulaimán Saldivar waseMexico City kwelaseMexico, uzakuthi cakatha okokuqala ngqa eMzantsi Afrika kwisithuba seenyanga ezimbini.
UMauricio, ongumongameli weWorld Boxing Council (WBC), uzakubalundwendwe oluphambili lomqondisi weGolden Gloves uRodney Berman xa inzalelwane yaseMdantsane, uSiyakholwa Kuse, ecela umngeni kwinjinga yeWBC kudidi lweminimumweight uMelvin ‘El Gringo’ Jerusalem wasePhilippines e-Emperors Palace, eKempton Park, Ekurhuleni, ngoMgqibelo umhla weshumi elinesithandathu kuMeyi.
“Ndikujonge ngamehlo abomvu ukundwendwela eMzantsi Afrika okokuqala ngqa,” itshilo lenzalelwane yaseMexico City neneminyaka engamashumi amahlanu anesithandathu.
UMauricio sele efince into engaphaya kweminyaka elishumi elinambini engumomangeli weWBC emva kokungena kwesisikhundla kulandela ukusweleka kukayise, uJosé Sulaimán, owongamela lombutho phantse iminyaka engamashumi amane. Ngaphambi koko, uMauricio wayengusosiba-jikelele weWBC. – Monwabisi Jimlongo
