Owaphumelela iintshinga zehlabathi ezintathu nowayeyimbunguzulu yabalandeli bamanqindi ngethuba wayephumelela rhoqo, uqale ubomi obutsha njengesekela-mqeqeshi e-9th South African Infantry (9SAI) Boxing Club eKhayelitsha.
Njengokuba esandokufika eKapa, uNkosinathi ‘Mabhere’ Joyi, oyinzalelwane yaseMadantsane, ungumncedisi kaXolani Kemka, ongumqeqeshi oyintloko.
UJoyi, owayeyintshatsheli ye-International Boxing Organisation (IBO) neye-International Boxing Federation (IBF) kudidi lweminimumweight uzakuncedisa ekuqeqesheni iimbethi-manqindi ezilithoba. Kwaye omnye wezoombethi-manqindi nguNtombokuqala Tolashe, oyinjinga yoMzantsi Afrika kudidi losiba kwicandelo labasetyhini.
“UNkosinathi Joyi ulapha kunye nathi. Uzokuncedisa ekuqeqesheni iimbethi-manqindi zethu,” utshilo umlawuli we-9SAI Boxing Club, uWelsh Macibela.
Eligqala lakwaJoyi belinqabile kumanqindi ukususela mhla lanqunyanyiswa kumjikelo wesithathu ngummi waseTanzania, uKalolo Amiri, ogama lokwenene linguHussein Amiri Chaubaya, eDar-Es-Salaam, ngo-Agasti 2024. – Monwabisi Jimlongo
