Kwilinge lokunyukela phezulu nokukhusela indawo yakhe kumanqwanqwa ehlabathi emanqindini, uSikho ‘Sequence’ Nqothole uzakuthabatha uhambo olusingise eMexico enyeke impumelelo kwilizwe langaphandle.
UNqothole, oneminyaka engamashumi amabini anethoba, uzakulwa nommi waseMexico uRene Calixto Babiano, ongekabathwa, ngoMgqibelo umhla wamashumi amabini anesihlanu kuMeyi (NgeCawa umhla wamashumi amabini anesithandathu ngokwexesha loMzantsi Afrika).
Kwaye ke ukungabethwa kukaCalixto akumoyikisi uNqothole, oqeqeshwa nguPhumzile ‘Sweet Chocolate’ Matyhila, owayeyintshatsheli yentambanani eMzantsi Afrika, eRhawutini.
“Izakuba ngumlo wemijikelo elishumi. Ekuqaleni ibizakuba ngumlo wentshinga, kodwa baziguqula izinto,” utshilo uNqothole, owazalelwa eMthatha.
Ngokwangoku, uNqothole ubekwa kwindawo yeshumi elinambini yiWorld Boxing Association (WBA), kwindawo yesibhozo kwi-International Boxing Federation (IBF) nakwindawo yesihlanu kwiWorld Boxing Organisation (WBO).
Kwelinye icala, uCalixto waseGuerrero lwelaseMexico, onqumamise iimbethi-manqindi ezimbini kwimilo yakhe emihlanu yokugqibela, ubekwa kwindawo yeshumi elinanye yiWBA. UCalixto uyiphumelele yonke imilo yakhe engamashumi amabini anesibini, enqumamisa amadoda alishumi elinanye.
“Ndiyayazi ukuba mhle kakhulu, akakabethwa. Kodwa lonto ayithethi ukuba uyandoyikisa. Andoyiki ukuya phaya, ndifike ndenze umsebenzi. Kudala ndikulento, kwaye ndilwe ngaphandle izihlandlo eziliqela ngethuba ndisekudidi lwabangahlawulwayo. Linqanaba kuphela eyona nto eyohlukileyo ngoku,” utshilo uNqothole.
“Ndiziva ngathi bafuna lendawo endime kuyo kumanqwanqwa ehlabathi. Soze bayifumane. Into endiyaziyo kukuba isandla sam sizakuphakanyiswa ngalamini.” – Monwabisi Jimlongo
