Inkonzo yesikhumbuzo songasekhoyo uDingaan ‘The Rose of Soweto’ Thobela izakubanjelwa e-Arena Holdings, eParktown, eRhawutini ngentlazane ngoLwesibini.
Ukanti inkonzo yomngcwabo kamfi izakubanjelwa eDlamini Multi Purpose Hall, eSoweto, ukuqala ngentsimbi yesibhozo kusasa kuyokuthi ga ngentlazane ngoLwesine. Uzakubekwa kwikhaya lokulinda kumangcwaba aseWestpark, eRandburg, kumntla weRhawuti.
Umzimba kaThobela, obusele ubanda, ubhaqwe kwiflat yakhe eLanglaagte, eRhawutini, ngoMvulo. UThobela, owazalelwa eChiawelo, eSoweto, ebeneminyaka engamashumi amahlanu anesixhenxe.
Ngaphandle kokuphumelela intshinga yoMzantsi Afrika, uThobela wakhe wabayintshatsheli yeWorld Boxing Council (WBC) kudidi lwesuper-middleweight, yeWorld Boxing Association (WBA) neWorld Boxing Organisation (WBO) kudidi lwelightweight.
