Isivumelwano esitsha phakathi kweBuffalo City Metro neChippa United sizakukhokelela ekubeni iiChilli Boys zifumane imali engaphaya kwezigidi ezingamashumi amathathu ngokuzisa imidlalo yebhola ekhatywayo ekudidi lwabahlawulwayo eMonti.
Ngokwesisivumelwano seminyaka emithathu, iiChilli Boys zizakufumana isigidi namakhulu amabini amawaka ngomdlalo ngamnye kwesixhenxe ezakudlalelwa eBuffalo City Stadium, eMonti.
Ngaphezu koko, iiChilli Boys zizakufumana izigidi ezintathu ezinesiqingatha ukwenzela ukuba igama leBCM libekwimpahla zazo zokudlala.
IiChilli Boys, ezaqala ukudlalela eMonti kumjikelo wesibini kwisizini yango-2015/16, sele zidlale imidlalo emine eBuffalo City Stadium ukususela ngoFebruwari kulonyaka.
Eliqela laseMpuma Koloni lizakohlula imidlalo yalo phakathi kweMonti neNelson Mandela Bay Stadium, eGqeberha. IiChilli Boys zifumana isixa-mali esizizigidi ezilishumi elinesithathu nesiqingatha kuMasipala oMbaxa waseNelson Mandela Bay.
