Kwakhona, usompempe nomgwebi emanqindini uSimphiwe Gceba uphuthume izihlangu zakhe zokubaleka, eshiya ngasemva isinxibo samanqindi ngethuba ethabatha inxaxheba kugqatso lwamashumi alithoba anesibhozo lweComrades Marathon, ebisuka eMgungundlovu isiya eThekwini ngeCawa.
Ekugqibeleni, uGceba, osoloko ebonwa engowesithathu phakathi eqongeni xa iimbethi-manqindi zinikana kanobom, ulufince ugqatso lweekhilomitha ezingamashumi asibhozo anethoba neemitha ezingamashumi alithoba anesibhozo, ngeeyure ezisibhozo nemizuzu engamashumi amane anethoba nemizuzwana engamashumi amathathu anesithathu.
Ukuzokuthi ga ngoku, uGceba, osebenza kwiRoad Accident Fund (RAF), uqhayisa ngeembasa ezingamashumi amabini ananye newaziphumelela kugqatso lweTwo Oceans nolweComrades Marathon.
“Ndaqala ihambo yokubaleka ngo-2009 kwiRCS Gugulethu Athletics Club eKapa, ndibaleka imidyarho yasekuhlaleni. Ndagqiba kwelokokuba ndithabathe inxaxheba kugqatso lweTwo Oceans nolweComrades Marathon ngo-2010. Sele ndiphumelele iimbasa ezilishumi elinanye kwiTwo Oceans nezilishumi kwiComrades Marathon,” uphefumle watsho uGceba.
Ukususela ngo-2010, losompempe nomgwebi wamanqindi uluphose nje iminyakana embalwa ugqatso lweComrades Marathon ngenxa yobhubhane weCOVID-19 kunye nokuxakeka zezinye izinto.
“Okwangoku, ndibalekela iRoad Accident Fund Athletics Club. Sizilolonga kusasa ngomGqibelo nangeCawa. Kwaye siphinda siziqeqeshe kumaqela ethu phakathi evekini kusasa nasemva kwemini,” utshilo uGceba.
Njengokuba luqukunjelwe ugqatso lweComrades Marathon yalonyaka, uGceba, owaphumelela iwonga leMost Promising Ring Official of the Year ngo-2019 nokholelwa ekubeni ukubaleka liyeza elinenzuzo kwimpilo, ngoku uzakugxila kuthando lwakhe lwesibini – ukuba ngusompempe nomgwebi kwiitumente zamanqindi eMpuma Koloni. – Monwabisi Jimlongo
