Inqindi lasekhohlo nebelizingenela lula libonakale linobuzaza njengokuba uVadim Musaev ebethe uThulani Mbenge eDuty-Free Tennis Stadium, eDubai, kwelase-United Arab Emirates (UAE) ngokuhlwa kwangoLwesihlanu.
Lommi waseRussia unqumamise uMbenge kumjikelo wesithathu, waze ngaloondlela wamohlutha intshinga ye-International Boxing Organisation (IBO) kudidi lwewelterweight.
Izinto ziqale ukonakala kwakumjikelo wokuqala njengokuba uMbenge ebengaliboni inqindi lasekhohlo likaMusaev. Ayikhange yothuse ke into yokubona uMbenge enqunyanyiswa kumjikelo wesithathu.
Ibikokokuqala ngqa uMbenge, oneminyaka engamashumi amathathu anesine, enqunyanyiswa ukususela mhla waqala ukulwa kudidi lwabahlawulwayo.
Ngoku uMbenge uphumelele imilo engamashumi amabini anesibini enqumamise amadoda alishumi elinesithandathu, wabethwa kathathu. Ukanti, uMusaev uyiphumelele yolishumi elinesine imilo yakhe, enqumamise amadoda alithoba.
