Iqela laKwaZulu-Natal, elidlala kwiBetway Premiership, iDurban City, ingqinile emva kwemini ngoMvulo ukuba ibakhululile abadlali abalithoba.
Abadlali abane, uTerrence Mashego, uTaahir Goedeman, uRonaldo Maarman noSiphiwe Mahlangu bakhululwe njengokuba zifikelele esiphelweni izivumelwano zabo zemboleko. UMashego wayebolekwe kwiMamelodi Sundowns, logama uGoedeman ebuyela kwiCape Town City, baze uMaarman noMahlangu babuyele kwiSekhukhune United.
Kwelinye icala, azivuselelwanga izivumelwano zengqesho zikaFalakhe Tshanini, u-Odwa Nyulu, uJoslin Kamatuka, u-Onele Rulwana noLindokuhle Chonco emva kokuphela kwazo kweliqela eliqeqeshwa nguKhalil Ben Youssef waseTunisia.
