IMamelodi Sundowns iqhubele phambili nesiqalo esihle kwisizini ka-2026/27 njengokuba iquthise iMarumo Gallants ngamanqaku amabini eqandeni kumdlalo weBetway Premiership eLoftus Versfeld, ePitoli, ngokuhlwa kwangoLwesithathu.
IiBrazilians ziphale phambili ngenqaku elifakwe lityendyana, uMalibongwe Khoza, ngomzuzu wamashumi amabini ananye, kwibhola ebivela kuBathusi Aubaas.
UCassius Mailula ubonakalisile ukuba kutheni na lento iSundowns ingazange iphozise maseko ukumtyikitya ekubuyeni kwakhe phesheya njengokuba efake inqaku lesibini leentshatsheni zase-Afrika ngomzuzu wamashumi amathandathu anesibhozo, kwibhola ebisuka kuBrayan León.
ISundowns, ekwindawo yesithathu kumanqwanqwa ePremiership, sele iphumelele imidlalo emibini, yabambana komnye, logama iGallants, esemsileni, ibambene kanye, yaze yabethwa kabini.
