Ayikho evumileyo ukugoba uphondo njengokuba iStellenbosch FC neChippa United zibambene ngenqaku elinye macala omabini kumdlalo weDStv Premiership eDanie Craven Stadium kwiCape Winelands ngokuhlwa kwangoLwesihlanu.
Kuthe kanye xa bekucingwa ukuba lamaqela mabini azakuhlaba ikhefu lingekho elifake inqaku, wegqi u-Antonio van Wyk wabeka iStellies endaweni entle emva kokuncediswa ngu-Andre de Jong xa kanye kuzakuphela isiqingatha sokuqala.
Iqela lasekhaya, iStellies, liye labethwa iduma elingophiyo ngethuba umdlali wasemva, u-Olivier Touré, efumana ikhadi elibomvu emveni kokuba ebefumene ikhadi lesibini elityheli ngomzuzu wamashumi amahlanu anesine.
UCraig Martin, owayesakudlalela i-Orlando Pirates neCape Town City, ufake inqaku lokulinganisa emva komdlalo omhle kaBienvenu Eva Nga ngomzuzu wamashumi amathandathu anesibhozo.
