AmaZulu afikelele kumaqela asibhozo okugqibela kwiNedbank Cup emva kokuquthisa iSekhukhune United ngamanqaku amabini eqandeni kumdlalo obubanjelwe ePeter Mokaba Stadium, ePolokwane, ngokuhlwa kwangoLwesine.
Eliqela laseThekwini lihlabe ikhefu linkqenkqeza phambili ngenqaku elixoxisayo, elifakwe nguJunior Sede Dion ngomzuzu wamashumi amabini anesithandathu. Abadlali beBabina Noko bakhalaze kakhulu kusompempe uLuxolo Badi besithi ibhola ibethe esandleni sikaDion ngaphambi kokuqengqelekela phakathi emnatheni.
Ilalela uVictor Letsoalo uqinisekise ukuba Usuthu luyangena kumaqela asibhozo okugqibela ngethuba efaka inqaku lesibini ngomzuzu wamashumi amathandathu anesibini. ULetsoalo ungene ebaleni, ethabatha indawo kaDion ekuqaleni kwesiqingatha sesibini.
