IBafana Bafana itywatyushe iCongo ngamanqaku amahlanu eqandeni kumdlalo wokuzibekela indawo kwitumente yamazwe ngamazwe ase-Afrika ngo-2025 mdlalo lowo obubanjelwe eNelson Mandela Bay Stadium, eGqeberha, ngokuhlwa ngoLwesihlanu.
IBafana ibiphala phambili ngamanqaku amathathu eqandeni ekupheleni kwesiqingatha sokuqala. Amanqaku amabini afakwe nguTeboho Mokoena, logama elinye lifakwe nguBathusi Aubaas.
IBafana iqale kakuhle kwisiqingatha sesibini njengokuba uLyle Foster efake inqaku lesine, waze u-Iqraam Rayners wabethelela isikhonkwane sokugqibela kumkhumbi weCongo.
