Njengonyana wolahleko ngemihla yaseBhayibhileni, uSibusiso ‘Prince’ Dlomo ubuyele ‘ekhaya’ waphinda wazimanya nomqeqeshi wakhe uCharrit Mukondeleli njengokuba efuna isiqalo esitsha emanqindini.
UDlomo, oneminyaka engamashumi amathathu anesihlanu noyinzalelwane yaseMgungundlovu, wayeyinjinga yoMzantsi Afrika kudidi lwejunior-welterweight ngethuba eshiya uMukondeleli nyakenye, kwaye ngoku ubuyele kuye ephaca.
UDlomo ubuyele kuMukondeleli eze njengokuba wahluthwa intshinga yakhe nguNtethelelo Nkosi, owamnqumamisa kumjikelo wethoba kumlo owawudibanise iimbethi-manqindi zaKwaZulu-Natal eThekwini ngoNovemba kulonyaka ophelileyo.
“UPrince ubuyele kum, ubuyele ekhaya. Sele ndimfakele isicelo seempepha zokulwa kwaBoxing South Africa. Kwaye usezakuqhubela phambili esilwa kudidi lwejunior-welterweight,” utshilo uMukondeleli.
UDlomo waphumelela intshinga yoMzantsi Afrika ngaphantsi kwesandla sikaMukondeleli ngethuba ebetha uXolani Mcotheli ngoMatshi 2021. Kwaye ke wayikhusela lentshinga izihlandlo ezintathu ngaphantsi kwesandla sikaMukondeleli. – Monwabisi Jimlongo
