Emva kweenyanga ezimbalwa ebethe intshatsheli yoMzantsi Afrika kwicandelo labasetyhini kudidi lwejunior-flyweight uNozwelethu Mathontsi kumlo owawungenguwo owentshinga, u-Okuhle Mthi ufumana ithuba lokulwela intshinga yephondo.
UMthi uzakucela umngeni kwinjinga yaseMpuma Koloni kudidi lwejunior-flyweight uSibabalwe Gwebityala kwiholo yaseScenery Park, eMonti, ngoMgqibelo umhla wesihlanu ku-Epreli.
UMthi waseMthatha ubekwa kwindawo yesibini kudidi lwejunior-flyweight eMzantsi Afrika, logama uGwebityala ekwindawo yesine.
Ukanti, uGwebityala wakwaKuni uzakubuyela kwindawo apho waphumelela khona intshinga yephondo emva kokubetha uZizo Skoti ngoMatshi kulonyaka ophelileyo.
Kusenjalo, inzalelwane yaseNgcobo ezinze eKapa uSkoti uzakuvana amandla noMathontsi kwimijikelo esibhozo kudidi lwejunior-flyweight.
USkoti ubethwe ngu-Owethu Rula kumlo wentshinga yaseMpuma Koloni kwiholo iNangoza Jebe, eNew Brighton, eGqeberha ebutsheni balenyanga.
Kwelinye icala, owayeyintshatsheli yoMzantsi Afrika kwicandelo labasetyhini kudidi lwejunior-bantamweight uThema Zuma uzakuphinda emva kwendlu noBabalwa Nonqonqotho kumlo wemijikelo emithandathu.
Inzalelwane yaseDududu uZuma, ohluthwe intshinga yakhe yoMzantsi Afrika nguNosiacwase Dube-Mutavhatsindi ngoDisemba, wabetha uNonqonqotho ngamanqaku kumlo wentshinga yelizwe eMgungundlovu ngoNovemba 2023.
UZuma ubekwa kwindawo yesibini kudidi lwejunior-bantamweight eMzantsi Afrika, aze uNonqonqotho abekwindawo yesithathu. UNonqonqotho ukhona nakuluhlu lodidi lwentambanani, apho akwindawo yesibini.
