Ibiyimvula yamanqaku njengokuba iStellenbosch FC iphumelele okokuqala emva kwendlala yemidlalo esibhozo ibetha iLamontville Golden Arrows ngamanqaku amane kwamathathu kumdlalo weBetway Premiership e-Athlone Stadium, eFlakeni, eKapa, ngokuhlwa kwangoLwesithathu.
IStellies siphale phambili ngenqaku elize noLangelihle Phili ngomzuzu weshumi elinesine, waze uSiyanda Ndlovu wafaka elokulinganisa xa kushiyeke imizuzu emibini ngaphambi kokuhlaba ikhefu.
Ummi waseNew Zealand u-Andre de Jong ufake inqaku lesibini leStellies kwimizuzu emine siqalile isiqingatha sesibini. Akubanga kudala njengokuba uJunior Sede Dion efake inqaku lokulinganisa kwimizuzu emihlanu emva koko.
UDe Jong ufake inqaku lakhe lesibini kulomdlalo ngomzuzu wamashumi amathandathu ananye. Kwanjengokuba bekusoloko kunjalo kulomdlalo, u-Isaac Cisse ufake elokulinganisa ngomzuzu wamashumi asixhenxe anesithathu.
UMuzomuhle Khanyi ufake inqaku ngomzuzu wamashumi asixhenxe anesithandathu, nqaku elo elinike iqela laseCape Winelands impumelelo ebekukudala liyinxanelwe. Eli ibilinqaku lokuqala likaKhanyi ukususela mhla wazimanya neStellies.
Kusenjalo, i-Orlando Pirates ibethe iPolokwane City ngenqaku elinye eqandeni, nqaku elifakwe nguTshepang Moremi e-Orlando Stadium, eSoweto.
Ukanti, iKaizer Chiefs ayikaphumeleli kwimidlalo yayo emine yokugqibela njengokuba ibambene ngeqanda macala omabini neSiwelele FC e-FNB Stadium, eNasrec, eRhawutini.
