IKaizer Chiefs ize ngemva ngaphambi kokuquthisa i-Orbit College ngamanqaku amathathu kwelinye kumdlalo weBetway Premiership eNelson Mandela Bay Stadium, eGqeberha, emva kwemini ngoMvulo.
IMswenko Boys yophise kuqala ngequza likaMbulelo Wagaba ngethuba ebetha unozinti weChiefs uBruce Bavuma emva kokunikwa ibhola nguLebohang Lesako ngomzuzu wamashumi amabini anesibini. Kwimizuzu emithathu ngaphambi kokuhlaba ikhefu, uWandile Dubai ufake elokulinganisa kwibhola ebivela kuBradley Cross.
Amakhosi aphale phambili okokuqala kulomdlalo ngethuba uMduduzi Shabalala evalela phakathi ibhola ebisuka kuThabiso Monyane ngomzuzu wamashumi amathandathu anesibhozo. Kwimizuzu elishumi emva koko, uSiphesihle Ndlovu ufake inqaku lesithathu emva kokubekelwa ibhola nguFlavio da Silva.
