Nangona nje engekasityikityi isivumelwano somlo, u-Asanda ‘Dynamite’ Gingqi, ufunge, wamunca iintupha, esithi uzakuhlala eyintshatsheli yoMzantsi Afrika kudidi lwejunior-lightweight nkqu nasemva komlo wakhe noKatlego ‘Kat’ Khanyisa.
UGingqi uzakukhusela intshinga yakhe isihlandlo sesine xa equbisana noKhanyisa waseTembisa kumlo ozakubanjelwa eSelborne Park, KuGompo City, kwisithuba seenyanga ezimbini ezizayo.
“Ndizakukhusela intshinga yam kumlo noKatlego Khanyisa njengokuba iBSA inqwale yathi mandilwe naye. Uzakuza apha, ezokulwa. Akekho umntu ozakuthabatha intshinga yam, kuquka noKhanyisa,” uphefumle watsho uGqingqi.
Lenzalelwane yaseMdantsane nephumelele imilo elishumi elinethoba, yanqumamisa amadoda alithoba, yabethwa kwimilo emibini, izakuya kumlo noKhanyisa emva kokukha phantsi isitya sithe qhu kumlo no-Azinga ‘Golden Boy’ Fuzile, owayeyinjinga yoMzantsi Afrika kudidi lwejunior-lightweight, kwiinyanga ezintathu ezigqithileyo. – Monwabisi Jimlongo
