IMamelodi Sundowns iyivule kakuhle isizini njengokuba ibethe i-TS Galaxy ngamanqaku amathathu kwamabini kumdlalo weBetway Premiership eMbombela Stadium, eNaspoti, ngokuhlwa kwangoLwesibini.
Izangxa zaseTshwane zikhawuleze zaphala phambili ngomzuzu wesixhenxe, ngequza likaBrayan León emva kokuba usompempe, u-Eugene Mdluli, ohlwaye iiRockets kulandela ukudlalwa kakubi kukaTashreeq Matthews nguJunior Zindoga ebhokisini.
Emva kwamalinge aliqela, ngelingeni iiRockets zilifumene inqaku lokulinganisa lisiza ngequza likaVictor Letsoalo ngomzuzu wamashumi amathathu anesithathu. IiRockets ziye zaphala phambili okokuqala kulomdlalo emva kokuba unozinti weSundowns, uRonwen Williams, ehlabe ngomkhonto ekhaya kumzuzu wamashumi asixhenxe anesithandathu.
Kanye xa iiRockets besele zicinga ukuba amanqaku amathathu sele esengxoweni, uSiphelele Mkhulise ufake inqaku lokulinganisa kushiyeke imizuzu emibini uphele umdlalo. UMkhulise ufake inqaku lempumelelo leSundowns kwixesha elongezwe ngusompempe.
Kusenjalo, iqela laseMpuma Koloni, iChippa United, idlale ngokulingana ngenqaku elinye macala neRichards Bay FC eDobsonville Stadium, eSoweto.
IiChilli Boys zihambe phambili ngenqaku elifakwe nguNtuthuko Mlotshwa ngomzuzu wamashumi amabini anesithathu, zaze iiNatal Rich Boyz zafaka elokulinganisa livela kuBaggio Tuli-Ngenovali Nashixwa kumzuzu wesithathu siqalile isiqingatha sesibini.
Kweminye imidlalo, ibiyimvula yamanqaku ngethuba iStellenbosch FC ibambe iPolokwane City ngamanqaku amathathu macala omabini eSeshego Stadium, ePolokwane, logama ibeliqanda macala phakathi kweMarumo Gallants nabatshakazi kwiPremiership, iKruger United, eRoyal Bafokeng Sports Palace, ePhokeng, eRustenburg.
