IKaizer Chiefs ihleli encotsheni yeBetway Premiership emva kokuquthisa iSekhukhune United ngamanqaku amabini eqandeni e-FNB Stadium, eNasrec, eRhawutini, ngokuhlwa kwangoLwesithathu.
Emva kokuba isiqingatha sokuqala siphele kungekho manqaku, Amakhosi aye aphala phambili ngenqaku likaLuke Baartman ngomzuzu wamashumi amathandathu anesithathu. UMduduzi Shabalala ufake inqaku lesibini leChiefs kushiyeke imizuzu emithandathu uphele umdlalo waqinisekisa ukuba Amakhosi aphumelele umdlalo wesibini kwemibini.
Kusenjalo, AmaZulu abambene ngenqaku elinye macala omabini ne-Orlando Pirates eKing’s Park Stadium, eThekwini, ngenqaku elifakwe nguTshepang Moremi, waze uThandolwenkosi Ngwenya wafakela Usuthu elokulinganisa.
Ukanti, inqaku likaMenzi Chili linike iMilford FC impumelelo njengokuba ibethe iSiwelele FC ngenqaku elinye eqandeni eMhlathuze Sports Complex, eRichards Bay, yaze iDurban City yabambana neLamontville Golden Arrows ngeqanda macala omabini eChatsworth Stadium.
