ITS Galaxy ingenile kumaqela asibhozo okugqibela kwiNedbank Cup emva kokubetha iD’General ngamanqaku amathathu eqandeni eFree State Stadium, eBloemfontein, emva kwemini ngeCawa.
Kubonakele ngathi iyasokolisa iD’General de yaphela imizuzu engamashumi amathathu. IiRockets zifake inqaku lazo lokuqala ngentloko kaSamir Nurkovic emva kwebhola ebisuka ku-Orebotse Mongae ngomzuzu wamashumi amathathu anesithathu.
USphiwe Mahlangu ungcangcazelise umnatha, efaka inqaku lesibini leeRockets kwimizuzu emithathu ngaphambi kokuphela kwesiqingatha sokuqala.
Inqaku lesithathu lingene kwimizuzu emihlanu siqalile isiqingatha sesibini ngethuba unozinti weD’General, uPaseka Hlalele, ekhabe ibhola yaya ngqo kuMlungisi Zwane, oyivalele emnatheni.
