UThembinkosi Lorch uthabathe iMamelodi Sundowns wayibeka kumaqela asibhozo okugqibela kwindebe yakwaNedbank njengokuba iiBrazilians zibethe iMaritzburg United ngamanqaku amabini eqandeni eLucas Moripe Stadium, e-Atteridgeville, ngokuhlwa kwangeCawa.
ULorch, ofike kwiinkunzi zaseTshwane evela kwi-Orlando Pirates ngoJanyuwari walonyaka, ufake inqaku lakhe lokuqala ngomzuzu wamashumi asixhenxe anesine. Ufake elesibini ngexesha eliligwaxaza likasompempe.
IiBrazilians kunye namanye amaqela asixhenxe – iChippa United, iTS Galaxy, iPirates, iStellenbosch FC, i-University of Pretoria, AmaZulu neSuperSport United – azakungena emnqwazini eRandburg ngentsimbi yesithandathu ngoMvulo.
