Ukuqinisekisa ukuba akabethwa kwesisihlandlo yenye yezinto ezisengqondweni kaXolisani ‘Nomeva’ Ndongeni njengokuba ezakunukisela ngamakhwapha nembethi-manqindi yaseMelika uRaymond ‘Danger’ Muratalla.
UNdongeni noMuratalla balwa kumlo onemijikelo elishumi eDesert Diamond Arena eGlendale, e-Arizona, ngoLwesihlanu, ngentseni yangoMgqibelo ngokwexesha loMzantsi Afrika.
Lenjinga yamhlamnene kwi-International Boxing Organisation (IBO) kudidi lwelightweight noMuratalla benze ubunzima obufanayo, isikali sayokuthi krwalakaxa kwiikhilogram ezingamashumi amathandathu anesibini neqhezu leemegagram ezilishumi elinesibhozo.
“Senze ubunzima obulinganayo. Ndingakuxelela into yokokuba naye uyayazi ukuba kuzakuliwa. Ndiqinisekile ngawo lomlo. Ndinazo izixhobo zokumqhawul’intloko. Ndikulungele ukushiya yonke into eqongeni. Ndizakubuya nempumelelo,” utshilo uNdongeni.
Lenzalelwane yaKwaBhaca, ezakukhokelelwa edabini nguReniel Aponte noMichael Robles abasuka eKO Fitness Gym, eMiami, yabethwa ziimbethi-manqindi ezimbini zaseMelika u-Arnold Barboa Junior no-Ernesto Mercado ngoJanyuwari kulonyaka nangoJulayi ngokulandelelana.
UNdongeni sele ephumelele imilo engamashumi amathathu ananye, wangqengqisa amadoda rngondlalelwanga izihlandlo ezilishumi elinesibhozo, waze wabethwa kwimilo emine.
Ukanti, uMuratalla, oneminyaka engamashumi amabini anesixhenxe, unqumamise amaxhoba alishumi elinesithandathu kulemilo yakhe elishumi elinethoba ayiphumeleleyo.
