Ngahle lizaliseke kungekudala iphupha lembethi-manqindi yakuKomani, uLuvuyo Sizani, njengokuba kucetywa ukuba alwele intshinga yodidi lwe-light-heavyweight engenamntu eMzantsi Afrika.
I-Ink Sport ifumanise ukuba uSizani, obekwa kwindawo yokuqala kudidi lwelight-heavyweight, uzakulwa noTyrone Schaper, obekwa kwindawo yesibini, ngoJulayi.
USizani, owazalelwa eLinge kuKomani eMpuma Koloni, yintshatsheli ye-African Boxing Union (ABU) SADC kudidi lwelight-heavyweight. Kwaye uphumelele imilo esixhenxe, woyiswa komnye.
USizani wabethwa kumjikelo wokuqala kumlo wakhe wokugqibela njengokuba wayesilwa nommi wase-United Kingdom, uJerome Pampellone kwintshinga ye-International Boxing (IBF) Intercontinental kudidi lwelight-heavyweight kwelaseNew Zealand ngo-Agasti kulonyaka ophelileyo.
Ephumelele kabini, waze wabethwa kanye, uSchaper ugqibele ukulwa mhla enqumamisa uDean Groom kumjikelo wesithathu e-Estcourt ngo-Agasti.
